പ:
പിതാവിനും പുത്രനും പരിശുദ്ധാത്മാവിനും സ്തുതി.
ജ:
ആദിമുതൽ എന്നന്നേക്കും തന്നെ ആമേൻ.
പ:
ആകാശവും ഭൂമിയും തൻ്റെ മഹത്വം കൊണ്ട് നിറഞ്ഞിരിക്കുന്ന ബലവാനായ ദൈവം തമ്പുരാൻ പരിശുദ്ധൻ - പരിശുദ്ധൻ - പരിശുദ്ധൻ - ഉന്നതങ്ങളിൽ സ്തുതി.
ജ:
കർത്താവിൻ്റെ തിരുനാമത്തിൽ വന്നവനും - വരുവാനിരിക്കുന്നവനും - വാഴ്ത്തപ്പെട്ടവനാകുന്നു - ഉന്നതങ്ങളിൽ സ്തുതി.
പ:
* ദൈവമേ, നീ പരിശുദ്ധനാകുന്നു.
ജ:
* ബലവാനേ, നീ പരിശുദ്ധനാകുന്നു.
പ:
* മരണമില്ലാത്തവനേ, നീ പരിശുദ്ധനാകുന്നു.
ജ:
* ഞങ്ങൾക്കുവേണ്ടി ക്രൂശിക്കപ്പെട്ട മശിഹാ തമ്പുരാനേ, ഞങ്ങളുടെ മേൽ അനുഗ്രഹം ചൊരിയേണമേ.
*(ഇപ്രകാരം മൂന്നു പ്രാവശ്യം ചൊല്ലണം)
പ:
ഞങ്ങളുടെ കർത്താവേ - ഞങ്ങളുടെമേൽ അനുഗ്രഹം ചൊരിയേണമേ.
ജ:
ഞങ്ങളുടെ കർത്താവേ കൃപതോന്നി ഞങ്ങളുടെമേൽ അനുഗ്രഹം ചൊരിയേണമേ.
പ:
ഞങ്ങളുടെ കർത്താവേ - ഞങ്ങളുടെ പ്രാർത്ഥനയും അപേക്ഷയും കൈക്കൊണ്ട് ഞങ്ങളുടെമേൽ അനുഗ്രഹം ചൊരിയേണമേ.
ജ:
ദൈവമേ, നിനക്കു സ്തുതി.
പ:
സൃഷ്ടാവേ, നിനക്ക് സ്തുതി.
ജ:
പാപികളായ അടിയാരോടു കൃപ ചെയ്യുന്ന മശിഹാ രാജാവേ, നിനക്ക് സ്തുതി.
കർത്താവിൻ്റെ പ്രാർത്ഥന (മത്തായി 6:9-13)
പ:
സ്വർഗ്ഗസ്ഥനായ ഞങ്ങളുടെ പിതാവേ...
ജ:
നിൻ്റെ നാമം വിശുദ്ധീകരിക്കപ്പെടേണമേ; നിൻ്റെ രാജ്യം വരേണമേ; നിൻ്റെ ഇഷ്ടം സ്വർഗ്ഗത്തിലെപ്പോലെ ഭൂമിയിലും ആകേണമേ; ഞങ്ങൾക്ക് ആവശ്യമുള്ള ആഹാരം ഇന്നു തരേണമേ; ഞങ്ങളുടെ കടക്കാരോട് ഞങ്ങൾ ക്ഷമിച്ചിരിക്കുന്നതുപോലെ - ഞങ്ങളുടെ കടങ്ങളെ ഞങ്ങളോടും ക്ഷമിക്കേണമേ; ഞങ്ങളെ പരീക്ഷയിൽ കടത്താതെ - ദുഷ്ടങ്കൽനിന്നു ഞങ്ങളെ വിടുവിക്കേണമേ; രാജ്യവും ശക്തിയും മഹത്വവും - എന്നേക്കും നിനക്കുള്ളതല്ലോ. ആമേൻ.
അല്ലെങ്കിൽ ഗീതം
പ:
* ദൈവമേ! നീ പരിശുദ്ധൻ ഹാലേ-ലൂയ്യാ
ജ:
* ബലവാനേ! നീ പരിശുദ്ധൻ ഹാലേ-ലൂയ്യാ
മൃതിരഹിതാ നീ പരിശുദ്ധൻ ഹാലേ-ലൂയ്യാ
അടിയാർക്കായ് ക്രൂശേറ്റവനെ, അനുഗ്രഹിച്ചീടണമേ
*(ഇപ്രകാരം മൂന്നു പ്രാവശ്യം ചൊല്ലണം)
പ:
കർത്താവേ! അനുഗ്രഹിക്ക, ഹാലേ-ലൂയ്യാ
ജ:
ദയവായ് നീ, അനുഗ്രഹിക്ക, ഹാലേ-ലൂയ്യാ
പ്രാർത്ഥന യാചന കൈക്കൊണ്ട്- അനുഗ്രഹിച്ചീടണമേ.
പ:
ദൈവമേ! സ്തുതി നിനക്ക്, ഹാലേ-ലൂയ്യാ
ജ:
സ്രഷ്ടാവേ! സ്തുതി നിനക്ക്, ഹാലേ-ലൂയ്യാ
പാപികളിൽ കനിയും, മ്ശിഹാ-രാജാ-സ്തുതി നിനക്കെന്നെന്നേക്കും
കർത്താവിൻ്റെ പ്രാർത്ഥന ഗീതം
പ:
സ്വർല്ലോകത്തി-ലിരുന്നരുളും
ദേവാ ഞങ്ങ-ളുടെ താതാ-
ജ:
നിന്തിരുനാമം പാവനമായ്
പെരുമാറപ്പട്ടീ-ടേണമേ
പ:
താതാ! നിന്നു-ടെ തിരുരാജ്യം
വന്നീടണമേ-ഈയുലകിൽ
ജ:
തിരുഹിതമെതുപോൽ സുരലോകേ-
അതുപോ-ലിവിടെയുമാ-കേണമേ
പ:
വേണ്ടും യാവ-ന ഞങ്ങൾക്കി
ന്നരുളണമേ നീ-കർത്താവേ
ജ:
അന്യരോടെങ്ങൾ ക്ഷമിച്ചതുപോൽ-
അടിയാർ പാപം മോചിക്കാ
പ:
പരീക്ഷയിലെങ്ങ-ളെയൊക്കരുതേ
ദുഷ്ടനിൽ നിന്നൊഴിവാക്കുക നീ-
ജ:
രാജ്യം ശക്തി മഹത്വങ്ങൾ
എന്നും നിനക്കുള്ളവയാ-മ്മീൻ
പ:
സ്വർഗ്ഗസ്ഥനായ പിതാവിൻ്റെ ഏകപുത്രനും വചനവുമായി ഞങ്ങളുടെ രാജാവായ കർത്താവേ, നിന്നെ ഞങ്ങൾ പുകഴ്ത്തുന്നു.
ജ:
ഞങ്ങളുടെ മശിഹാതമ്പുരാനേ -ഞങ്ങൾ എല്ലാവരുടേയും മേൽ അനുഗ്രഹം ചൊരിയേണമേ. ആമേൻ.
ശുശ്രൂ:
“ഞങ്ങൾ നിങ്ങളോടറിയിച്ചതിനു വിപരീതമായി, ഞങ്ങളാകട്ടെ, സ്വർഗ്ഗത്തിൽ നിന്ന് ഒരു ദൂതനാകട്ടെ - നിങ്ങളോടു സുവിശേഷം അറിയിച്ചാൽ അവൻ ശപിക്കപ്പെട്ടവൻ” എന്നു വിശുദ്ധ പൗലോസ് അപ്പോസ്തലൻ പറയുന്നു. കണ്ടാലും എല്ലാ ഭാഗങ്ങളിൽ നിന്നും - പലതരമായ ഉപദേശങ്ങൾ പുറപ്പെടുന്നു. എന്നാൽ ദൈവത്തിൻ്റെ ഉപദേശത്തിൽ തുടങ്ങി അവസാനിപ്പിക്കുന്നവൻ ഭാഗ്യവാനാകുന്നു.
അല്ലെങ്കിൽ ഗീതം
പ:
പൗലോസ് ശ്ലീഹാ ധന്യൻ തൻ ചൊൽ കേൾക്കാ-നാം
ജ:
ഞങ്ങൾ നിങ്ങളോടറിയിച്ച നിർമ്മല സുവിശേഷം വിട്ട്
വേറൊ-ന്നറിയിക്കുന്നവനോ - സ്വർദൂതൻ താനായാലും
ശാപഗ്രസ്ഥനവൻ നൂ-നം
പലതരം ഉപദേശങ്ങളഹോ! പാരിൽ മുളച്ചു പരക്കുന്നു
ദൈവത്തിന്നുപദേശം തൊട്ടവസാനിപ്പിപ്പോൻ ധന്യൻ
(ലേഖനം വായിക്കുന്നതിനുമുമ്പുളള പ്രാർത്ഥന)
പ:
ദൈവമായ കർത്താവേ, ഈ സമയത്ത് തിരുസന്നിധിയിൽ കഴിക്കുന്ന ഞങ്ങളുടെ പ്രാർത്ഥനകളും അപേക്ഷകളും കൈക്കൊള്ളേണമേ. ഞങ്ങളുടെ കർത്താവും ദൈവവുമേ, നിൻ്റെയും നിൻെറ അപ്പോസ്തലന്മാരുടേയും നിൻ്റെ സഭയുടെ ശില്‌പിയും പണിക്കാരനുമായ പൗലോസ് അപ്പോസ്തലൻ്റെയും കല്‌പനകളെ വെടിപ്പോടും വിശുദ്ധിയോടും കൂടെ ആചരിപ്പാൻ എന്നേക്കും ഞങ്ങളെ യോഗ്യതയുള്ളവരാക്കേണമേ.
ജ:
ആമേൻ.
ശുശ്രൂ:
വിശുദ്ധ ____ അപ്പോസ്തലൻ ____ എഴുതിയ ____-ാം ലേഖനം ____-ാം അദ്ധ്യായത്തിൽനിന്ന്
ജ:
കർത്താവേ, നിൻ്റെ വചനങ്ങൾ തിരിച്ചറിയുന്നതിന് ഞങ്ങൾക്ക് കൃപ നൽകേണമേ.
(ഇവിടെ നിശ്ചയിക്കപ്പെട്ട ലേഖനം വായിക്കുന്നു.)
പ:
ദൈവമായ കർത്താവേ, ദൈവീകമായ നിൻ്റെ വചനങ്ങളുടെ അറിവ് ഞങ്ങൾക്കു സൗജന്യമായി നൽകേണമേ. നിൻെറ വിശുദ്ധ സുവിശേഷത്തിൻ്റെ സാരാംശവും നിൻെറ ദിവ്യ ജ്‌ഞാനങ്ങളുടെ ഐശ്യര്യവും വിശുദ്ധാത്മാവിൻ്റെ നൽവരവും കൊണ്ട് ഞങ്ങളെ നിറയ്ക്കേണമേ. ഞങ്ങൾ സന്തോഷപൂർവ്വം തിരുകല്പനകൾ ആചരിക്കുകയും തിരുഹിതം പരിപൂർണ്ണമായി നിവർത്തിക്കയും ചെയ്‌വാൻ ഞങ്ങൾക്കു കൃപ നൽകേണമേ. നിന്നിൽനിന്നുള്ള അനുഗ്രഹങ്ങൾക്കും കരുണകൾക്കും ഞങ്ങൾ എല്ലായ്‌പ്പോഴും യോഗ്യതയുള്ളവരായിത്തീരുകയും ചെയ്യേണമേ.
ജ:
ആമേൻ.
പ:
നമുക്കെല്ലാവർക്കും സമാധാനമുണ്ടായിരിക്കട്ടേ.
ജ:
ദൈവമായ കർത്താവ് നമ്മെ എല്ലാവരേയും യോഗ്യതയുള്ളവരാക്കട്ടെ.
പ:
ലോകത്തിനു ജീവനും രക്ഷയും പ്രസംഗിക്കുന്ന / അറിയിക്കുന്ന, വിശുദ്ധ മത്തായി / മർക്കോസ് / ലൂക്കൊസ് / യോഹന്നാൻ എഴുതിയ ജീവൻ നൽകുന്ന അറിയിപ്പായ/പ്രസംഗമായ, നമ്മുടെ കർത്താവേശു മശിഹായുടെ സുവിശേഷം ____-ാം അദ്ധ്യായം ____ മുതൽ ____ വരെ വാക്യങ്ങൾ.
ജ:
കർത്താവേ, നിൻ്റെ വചനങ്ങൾ അനുസരിച്ച് ജീവിപ്പാൻ കൃപ അരുളേണമേ.
(ഇവിടെ പട്ടക്കാരൻ സുവിശേഷത്തിൽ നിന്ന് നിശ്ചയിക്കപ്പെട്ട വേദഭാഗം വായിക്കുന്നു.)
പ:
നമുക്കെല്ലാവർക്കും സമാധാനമുണ്ടായിരിക്കട്ടേ.
ജ:
ആമേൻ.
എല്ലാവരും കൂടി ഗീതം
1
ദൈവവചനം ജീവനും ശക്തിയും ആകയാൽ
ആത്മരക്ഷയുണ്ടേവനും ഉള്ളത്തിൽ കൈക്കൊണ്ടാൽ
ആത്മമരണം മാറും നീതിയിലവൻ വാഴും
കേൾക്കുക നാം കാക്കുക നാം ജീവൻ്റെ വാക്യങ്ങൾ
2
ദൈവത്തിൻ സുവിശേഷം-വിലമതിയാതുള്ളത്
ദാനം ഇ-തതിശയം ഗുണമേറീട്ടുള്ളത്
തേനേക്കാൾ നല്ല രസം-ഇതിനുണ്ട് നിശ്ചയം
ഹല്ലേലൂയ്യാ ഉ-ഹല്ലേലൂയ്യാ പുഷ്പമണം ഒപ്പമല്ല
കൃപ തന്നിൽ വളരുന്ന - ആത്മാവിതിൻ-രസമറിയും
ദുഃഖം പൂണ്ടാത്മാവും-സന്തോഷം-പ്രാപിക്കും
ഇതുമൂലം-വിശ്വാസി-മോചനം നേടുന്നു
ഹല്ലേലൂയ്യാ-ഉ-ഹല്ലേലൂയ്യാ-സ്വർഗ്ഗതലം മോദിക്കും
രക്ഷകനെ ഈ വചനം-രക്ഷയ്ക്കായ് ഞങ്ങളുടെ
ഹൃദയേ നീ ഫലിപ്പിച്ച്-ഈക്ഷിതിയിൽ നിൻ അടിയാർ
സൂക്ഷ്മതയായ് നടപ്പാനും മോക്ഷത്തിൽ വരുവാനും
ഹല്ലേലൂയ്യാ-ഉ-ഹല്ലേലൂയ്യാ-നീ കൃപ നൽകീടണമേ
പാപികളെ പരലോകെ-ചേർപ്പാൻ-നൽവഴിയായി
പഴുതറ്റ-സുവിശേഷം-കല്പിച്ച രക്ഷകനെ
പാപികളാം-ഞങ്ങളുടെ-മദ്ധ്യേ നീ-എഴുന്നള്ളി
ഹല്ലേ-ലൂയ്യാ-ഉ-ഹല്ലേ-ലൂയ്യാ-ഈ വചനം-വിളങ്ങിക്ക
സത്യാത്മാവേ-വന്നീ-ജീവൻ്റെ-വചനത്തെ
പാപത്താൽ ഇരുളായ-ദാസരുടെ ഹൃദയത്തിൽ
ദീപം പോൽ നിലനിർത്തി-ശോഭിപ്പിച്ചടിയാരെ
ഹാലേ-ലൂയ്യാ-ഉ-ഹല്ലേ-ലൂയ്യാ-സുവിശേഷേ-നടത്തേണമേ
അതിശയമാം ദാനത്തിൻ-നാഥനാമീശോയേ
ഹൃത്തുങ്കൽ-ശോഭിച്ച്
ഏവൻഗേലിയോൻ രസത്തെയും അതിനുള്ള ബലത്തെയും
അടിയാരെ-ഗ്രഹിപ്പിച്ച്
ഹാലേ-ലൂയ്യാ-ഉ-ഹല്ലേ-ലൂയ്യാ-സുവിശേഷേ-നടത്തേണമേ
അല്ലെങ്കിൽ
എല്ലാവരും: നിങ്കലേക്ക് അടുത്തു വരുവാനായി ലോകത്തിൻ്റെ പ്രകാശമായ സുവിശേഷം ഞങ്ങൾക്കു തരുന്നവനായ കർത്താവേ, നിനക്കു സ്തുതി. ഇപ്പോൾ നിൻ്റെ സുവിശേഷത്തിൽനിന്ന് ഞങ്ങൾ കേട്ടിരിക്കുന്ന ജീവനുള്ള വചനങ്ങൾ നിമിത്തം നിന്നെ മഹത്വീകരിപ്പാൻ ഞങ്ങളെ യോഗ്യതയുള്ളവരാക്കിത്തീർക്കേണമേ- ആമേൻ.
3
ദൈവവചനമേ ദിവ്യവിശേഷം സർവ്വദാ മോദമോടെ - അതിൽ
ദൈവമേ നോക്കുവാൻ കണ്ണെനിക്കേകുക ജീവദായാപരനേ
4
കർത്താവേ നിന്നോ-ടടുപ്പാൻ വിശ്വവെളിച്ചമാം
സുവിശേഷം നീ-തന്നതിനാൽ സ്തോത്രം
നിന്നറിയിപ്പിൻ-നിന്നുയിർവചനം കേൾക്കയിൽ നിന്നെ
മഹത്വീകരിപ്പാൻ-യോഗ്യരാക്ക ഞങ്ങളെ
സുവിശേഷ വെളിച്ചം-സകലർക്കും ശോഭിച്ചീടുവാൻ
വന്നവനായ-മഹിമയെഴും രക്ഷകാ
പാപികളാം ഞങ്ങൾ അന്ധത നീങ്ങി ശോഭിപ്പാനായ്
ഈ സുവിശേഷം-ഫലകരമാക്കീടുക
5
യേശുവിൻ തിരുപ്പാദത്തിൽ-ഇരുന്നു കേൾക്ക നാം
തൻ്റെ വിശുദ്ധ വാക്യത്തിൽ-നമ്മുടെ ജീവനാം
യേശുവിൻ സുവിശേഷം-ദിവ്യമാം ഉപദേശം
കേൾക്കുക നാം-കാക്കുക നാം-
ജീവൻ്റെ വാക്യങ്ങൾ (2)
6
വേദപ്രമാണത്തിൽനിന്നു
വേഗം ഞാനത്ഭുത കാര്യം
സാദരം കാൺമാനെൻ കൺകൾ
നാഥാ! തുറക്കണമെ!
7
നല്ല ദേവനേ! ഞങ്ങൾ എല്ലാവരെയും
നല്ലതാക്കി നിൻ ഇഷ്ടത്തെ ചൊല്ലീടേണമേ
വേദവാക്യങ്ങൾ ഞങ്ങൾക്കാദായമാവാൻ
വേദനാഥനേ! നിൻ്റെ ജ്ഞാനം നൽകുകേ
പ:
ദൈവമായ കർത്താവേ, സ്തുതിയും സ്തോത്രവും തേജസ്സും പുകഴ്ച്ചയും മാഞ്ഞുപോകാത്ത നല്ല മഹിമയും നിരന്തരം നിനക്കു കരേറ്റുവാൻ ഞങ്ങൾ യോഗ്യതയുള്ളവരായിത്തീരേണമേ.
കടങ്ങളെ പരിഹരിക്കുന്നവനും, പാപങ്ങളെ ക്ഷമിക്കുന്നവനും, അശുദ്ധരെ ശുദ്ധീകരിക്കുന്നവനും, അനുതാപികളെ കൈക്കൊള്ളുന്നവനും, പാപികളുടെ തിരിച്ചുവരവിൽ ഇഷ്ടമുള്ളവനും കുറ്റക്കാരുടെ രക്ഷയ്ക്കായി വാഞ്ചിച്ചിരിക്കുന്നവനും, വിളിപ്പീൻ, ഞാൻ ഉത്തരം പറയുമെന്നും, മുട്ടുവീൻ, ഞാൻ തുറന്ന് എൻ്റെ കൈ നിങ്ങൾക്കു നീട്ടിത്തന്ന്, നിങ്ങളുടെ പാപങ്ങളും അകൃത്യങ്ങളും ക്ഷമിക്കുമെന്നും, അരുളി ചെയ്തവനുമായ തനിക്ക് ദൈവീകമായ ഈ സ്തോത്ര ശുശ്രൂഷാനേരത്തും, നമ്മുടെ ആയുസ്സിൻ്റെ എല്ലാ ദിവസങ്ങളിലും സ്തുതിയും ബഹുമാനവും വന്ദനവും എന്നേക്കും യോഗ്യമായിരിക്കുന്നു.
ജ:
ആമേൻ.
പ:
സർവ്വശക്തിയുള്ള പിതാവായ ദൈവമേ, നിൻെറ മുമ്പാകെയും, നിൻെറ സ്നേഹം മൂലം ലോകത്തിനു വെളിപ്പെട്ട നിൻെറ വാത്സല്യ പുത്രൻ്റെ മുമ്പാകെയും, തൻ്റെ ആവസിപ്പാൽ ലോകത്തെ പരിപാവനം ആക്കിത്തീർക്കുന്ന നിൻെറ പരിശുദ്ധാത്മാവിൻെറ മുമ്പാകെയും, ഞങ്ങളുടെ സത്യ അനുതാപവും സ്തുതി സ്തോത്രങ്ങളും ഞങ്ങൾ സമർപ്പിച്ചുകൊള്ളുന്നു.
കർത്താവേ, വിശുദ്ധിയോടെ നിൻെറ വിശുദ്ധ മേശയിൽ സംബന്ധിപ്പാൻ ഞങ്ങളെ നീ യോഗ്യതയുള്ളവരാക്കേണമേ. ഞങ്ങളുടെ ആയുഷ്ക്കാലമൊക്കെയും നിരപരാധവും നിർമ്മലവുമായ ജീവിതത്തിൽ ഞങ്ങളെ കാത്തുകൊള്ളേണമേ. കർത്താവേ ഞങ്ങളുടെ വയോധികരെ താങ്ങിക്കൊള്ളേണമേ. ഞങ്ങളുടെ യുവജനങ്ങളെ പരിപക്വതയുള്ളവരാക്കേണമേ. ഞങ്ങളുടെ പൈതങ്ങളെ നിൻെറ കൃപയിൽ വളർത്തേണമേ. ഞങ്ങളുടെ സ്ത്രീകളെ സൗമ്യതയും സാവധാനതയുമാകുന്ന അക്ഷയഭൂഷണത്താൽ അലങ്കരിക്കേണമേ. ഞങ്ങളുടെ രോഗികളെ നീ സൗഖ്യമാക്കേണമേ. അനാഥരേയും വിധവമാരേയും നീ സംരക്ഷിക്കേണമേ. നിൻെറ സമാധാനം ഞങ്ങളുടെ ഇടയിൽ വാഴുമാറാകേണമേ. ഞങ്ങൾ നിനക്കും നിൻ്റെ പിതാവിനും പരിശുദ്ധാത്മാവിനും സ്തുതിയും സ്തോത്രവും കരേററുന്നു.
ജ:
ആമേൻ.
നിഖ്യാ വിശ്വാസപ്രമാണം
പ:
പിതാവായ-സർവ്വശക്തനായ...
ജ:
ആകാശത്തിൻ്റെയും ഭൂമിയുടേയും - കാണപ്പെടുന്നവയും കാണപ്പെടാത്തവയുമായ - സകലത്തിൻ്റെയും സൃഷ്‌ടാവായ -സത്യ ഏക ദൈവത്തിൽ ഞങ്ങൾ വിശ്വസിക്കുന്നു.
പ:
ദൈവത്തിൻ്റെ ഏകപുത്രനും...
ജ:
സർവ്വലോകങ്ങൾക്കും മുമ്പേ പിതാവിൽനിന്ന് ജനിച്ചവനും - പ്രകാശത്തിൽ നിന്നുള്ള പ്രകാശവും - സത്യ ദൈവത്തിൽ നിന്നുള്ള സത്യ ദൈവവും - ജനിച്ചവനും, സൃഷ്ടിയല്ലാത്തവനും,- തത്വത്തിൽ പിതാവിനോട് ഏകത്വമുള്ളവനും - സകല സൃഷ്ടിക്കും മുഖാന്തരമായവനും - മനുഷ്യരായ ഞങ്ങൾക്കും ഞങ്ങളുടെ രക്ഷയ്ക്കും വേണ്ടി - സ്വർഗ്ഗത്തിൽ നിന്നിറങ്ങി, പരിശുദ്ധാത്മാവിനാൽ കന്യക മറിയാമിൽ നിന്ന് - ശരീരം ധരിച്ച് മനുഷ്യനായി - പൊന്തിയോസ് പീലാത്തോസിൻ്റെ നാളുകളിൽ, ഞങ്ങൾക്കുവേണ്ടി ക്രൂശിക്കപ്പെട്ട് - കഷ്ടതയനുഭവിച്ച് മരിച്ച് അടക്കപ്പെട്ട് - തിരുഹിതപ്രകാരം മൂന്നാം ദിവസം ഉയിർത്തെഴുന്നേററ് - സ്വർഗ്ഗത്തിലേക്ക് കരേറി - തൻ്റെ പിതാവിൻ്റെ വലത്തുഭാഗത്തിരിക്കുന്നവനും - അവസാനമില്ലാത്ത രാജ്യത്വമുള്ളവനും - ജീവിച്ചിരിക്കുന്നവരേയും മരിച്ചവരേയും വിധിപ്പാൻ, തൻ്റെ മഹാപ്രഭാവത്തേടെ ഇനിയും വരുവാനിരിക്കുന്നവനുമായ, യേശു മശിഹാ ആയ ഏക കർത്താവിലും ഞങ്ങൾ വിശ്വസിക്കുന്നു.
പ:
സകലത്തേയും ജീവിപ്പിക്കുന്ന കർത്താവും...
ജ:
പിതാവിൽ നിന്നു പുറപ്പെട്ട് - പിതാവിനോടും പുത്രനോടും കൂടെ വന്ദിക്കപ്പെട്ട് സ്തുതിക്കപ്പെടുന്നവനും - പ്രവാചകന്മാരും അപ്പോസ്തലന്മാരും മുഖാന്തരം സംസാരിച്ചവനുമായ - ജീവനും വിശുദ്ധിയുമുള്ള ഏക ആത്മാവിലും - സാർവത്രികവും അപ്പൊസ്തോലികവുമായ - ഏക വിശുദ്ധ സഭയിലും ഞങ്ങൾ വിശ്വസിക്കുന്നു.
പ:
പാപമോചനത്തിനുള്ള സ്‌നാനം...
ജ:
ഒന്നുമാത്രമെന്ന് ഞങ്ങൾ ഏറ്റുപറഞ്ഞ് - മരിച്ചവരുടെ ഉയിർത്തെഴുന്നേൽപ്പിനും - വരുവാനിരിക്കുന്ന ലോകത്തിലെ പുതിയ ജീവനും - ഞങ്ങൾ നോക്കിപ്പാർക്കുകയും ചെയ്യുന്നു. ആമേൻ
പ:
പിതാവിനും പുത്രനും പരിശുദ്ധാത്മാവിനും സ്തുതി.
ജ:
ആദിമുതൽ എന്നന്നേക്കും തന്നെ ആമേൻ.
സമാധാനത്തിൻ്റെ പ്രാർത്ഥന
പ:
സകലത്തിൻ്റെയും ദൈവവും കർത്താവുമായുള്ളോവേ, അയോഗ്യരാകുന്ന ഞങ്ങൾ, വഞ്ചന ഇല്ലാത്തവരും സ്നേഹബന്ധത്തിൽ ഐക്യപ്പെട്ടവരുമായി, നിർമ്മല ഹൃദയത്തോടും ഉത്തമ മന:സാക്ഷിയോടും കൂടെ ഏകാത്മാവിൽ, സമാധാനത്തിൻ്റെയും സ്നേഹത്തിൻ്റെയും ബന്ധത്തിൽ, അന്യോന്യം സൽക്കരിപ്പാൻ, നിൻ്റെ പരിശുദ്ധാത്മാവിൻ്റെ നൽവരങ്ങൾ ഞങ്ങളുടെ മേൽ അയച്ചുതരേണമേ.
ജ:
ആമേൻ.
പ:
നമുക്കെല്ലാവർക്കും സമാധാനമുണ്ടായിരിക്കട്ടേ.
ജ:
ആമേൻ.
ശുശ്രൂ:
നമ്മുടെ ദൈവമായ കർത്താവിൻ്റെ സ്നേഹത്താൽ നാം എല്ലാവരും തമ്മിൽ തമ്മിൽ സമാധാനം ആചരിക്കേണം.
(ഇവിടെ സമാധാനത്തിൻ്റെ ലക്ഷ്യമായ ഹസ്തദാനം കൊടുത്തുതീരുവോളം ജനം ആവർത്തിച്ച് ചൊല്ലേണ്ടത്)
ജ:
* മശിഹാ തമ്പുരാൻ്റെ സ്നേഹവും സമാധാനവും സർവ്വദാ ഞങ്ങളുടെ ഇടയിൽ വസിക്കുമാറാകേണമേ.
*(ഗീതമായിട്ടും ചൊല്ലാം)
പ:
കാരുണ്യവാനായ കർത്താവേ, മഹോന്നതങ്ങളിൽ വസിക്കുകയും താഴ്മയുള്ളവരെ കടാക്ഷിക്കുകയും ചെയ്യുന്നവൻ നീ മാത്രമായിരിക്കയാൽ നിൻ്റെ സന്നിധിയിൽ തലകളെ വണക്കിയിരിക്കുന്ന ഞങ്ങൾക്ക് അനുഗ്രഹങ്ങൾ അയച്ച്, നിൻ്റെ ഏകപുത്രൻ്റെ കൃപയാൽ ഞങ്ങളെ അനുഗ്രഹിക്കേണമേ. അവനോടും നിൻ്റെ പരിശുദ്ധാത്മാവിനോടും കൂടെ സ്തുതിയും ബഹുമാനവും ആധിപത്യവും എന്നേക്കും നിനക്ക് യോഗ്യമായിരിക്കുന്നു.
ജ:
ആമേൻ.
പ:
പിതാവായ ദൈവത്തിൻ്റെ സ്നേഹവും ഏകപുത്രൻ്റെ കൃപയും, പരിശുദ്ധാത്മാവിൻ്റെ സംസർഗ്ഗവും സഹവാസവും നമ്മൾ എല്ലാവരോടും കൂടെ എന്നേക്കും ഉണ്ടായിരിക്കട്ടേ.
ജ:
ആമേൻ.
പ:
പിതാവായ ദൈവത്തിൻ്റെ വലത്തുഭാഗത്ത്, മശിഹാ തമ്പുരാൻ എഴുന്നള്ളിയിരിക്കുന്ന ഇടമായ ഉയരത്തിൽ നമ്മുടെ എല്ലാവരുടേയും ബോധങ്ങളും, വിചാരങ്ങളും, ഹൃദയങ്ങളും ആയിരിക്കേണം.
ജ:
ദൈവമായ കർത്താവിങ്കൽ അവയാകുന്നു.
പ:
സർവ്വസൃഷ്ടിയുടെയും നിർമ്മാതാവിനെ സ്തോത്രം ചെയ്യുന്നതും, വന്ദിക്കുന്നതും, സ്തുതിക്കുന്നതും...
ജ:
സത്യമായിട്ടു യോഗ്യവും ന്യായവുമാകുന്നു. ആമേൻ.
പ:
പാപമില്ലാത്തവൻ പാപികളായ നമുക്കുവേണ്ടി മനസ്സോടെ മരണം സഹിപ്പാൻ ഒരുങ്ങിയപ്പോൾ അവൻ അപ്പമെടുത്ത് സ്തോത്രം ചൊല്ലി നുറുക്കി, ശിഷ്യന്‌മാർക്കു കൊടുത്തു; വാങ്ങി ഭക്ഷിപ്പിൻ; ഇതു നിങ്ങൾക്കു വേണ്ടി നൽകുന്ന എൻ്റെ ശരീരം; എൻ്റെ ഓർമ്മയ്ക്കായി ഇതു ചെയ്യുവിൻ എന്ന് അരുളിച്ചെയ്തു.
ജ:
ആമേൻ.
പ:
അവ്വണ്ണം തന്നെ അത്താഴം കഴിഞ്ഞശേഷം അവൻ പാനപാത്രവും കൊടുത്തു. ഈ പാനപാത്രം നിങ്ങൾക്കുവേണ്ടി ചൊരിയുന്ന എൻ്റെ രക്തത്തിലെ പുതിയനിയമം ആകുന്നു. ഇതു കുടിക്കുമ്പോഴൊക്കെയും എൻ്റെ ഓർമ്മയ്ക്കായി ചെയ്‌വിൻ എന്ന് പറഞ്ഞു. എൻ്റെ പിതാവിൻ്റെ രാജ്യത്തിൽ നിങ്ങളോടുകൂടെ പുതുതായി കുടിക്കും നാൾ വരെ ഞാൻ മുന്തിരിവള്ളിയുടെ ഈ അനുഭവത്തിൽ നിന്ന് ഇനി കുടിക്കുകയില്ല എന്ന് അരുളിച്ചെയ്തു.
ജ:
ആമേൻ.
പ:
നാം അനുഗ്രഹിക്കുന്ന അനുഗ്രഹപാത്രം ക്രിസ്തുവിൻ്റെ രക്തത്തിൻ്റെ കൂട്ടായ്മയല്ലയോ? നാം നുറുക്കുന്ന അപ്പം ക്രിസ്തുവിൻ്റെ ശരീരത്തിൻ്റെ കൂട്ടായ്മയല്ലയോ? അപ്പം ഒന്ന് ആകകൊണ്ട് പലരായ നാം ഒരു ശരീരമാകുന്നു. നാം എല്ലാവരും ആ ഒരേ അപ്പത്തിൻ്റെ അംശികൾ ആകുന്നുവല്ലോ. അങ്ങനെ നിങ്ങൾ ഈ അപ്പം തിന്നുകയും പാനപാത്രം കുടിക്കുകയും ചെയ്യുമ്പോൾ ഒക്കെയും, കർത്താവു വരുവോളം അവൻ്റെ മരണത്തെ പ്രസ്താവിക്കുന്നു.
ജ:
കർത്താവേ, നിൻ്റെ മരണത്തെ ഞങ്ങൾ ഓർമ്മിക്കുകയും നിൻ്റെ ഉയിർത്തെഴുന്നേൽപ്പിൽ ഞങ്ങൾ ആനന്ദിക്കുകയും രണ്ടാമത്തെ നിൻെറ വരവിനായി ഞങ്ങൾ നോക്കിപ്പാർക്കുകയും ചെയ്യുന്നു.
പ:
കർത്താവേ, നിൻ്റെ മരണത്തേയും കബറടക്കത്തേയും മൂന്നാം ദിവസത്തെ ഉയിർത്തെഴുന്നേല്പ്പിനേയും സ്വർഗ്ഗാരോഹണത്തേയും, പിതാവായ ദൈവത്തിൻ്റെ വലതുഭാഗത്തുള്ള ഇരിപ്പിനേയും, ഭൂലോകത്തെ നീതിയോടെ വിധിച്ച് അവനവൻ്റെ പ്രവൃത്തികൾക്ക് തക്കവണ്ണം എല്ലാവർക്കും പ്രതിഫലം നല്‌കുന്നതായ രണ്ടാമത്തെ നിൻ്റെ വരവിനേയും ഞങ്ങൾ ഓർത്തുകൊണ്ട് ഈ അപ്പത്തേയും ഈ പാനപാത്രത്തേയും ഞങ്ങൾ വേർതിരിച്ചുകൊള്ളുന്നു.
ജ:
ദൈവമായ കർത്താവേ, നിന്നെ ഞങ്ങൾ സ്‌തുതിക്കുകയും വാഴ്ത്തുകയും വന്ദിക്കുകയും ചെയ്യുന്നു.
പ:
കർത്താവേ, ബലഹീന ദാസരായ ഞങ്ങൾ നിൻ്റെ കൃപയെ നന്ദിപൂർവ്വം സ്വീകരിച്ച് സകലത്തിനുവേണ്ടിയും സകലത്തെക്കുറിച്ചും നിൻ്റെ ആർദ്രതയെ അഭിനന്ദിച്ചുകൊള്ളുന്നു.
ജ:
ദൈവമായ കർത്താവേ, നിന്നെ ഞങ്ങൾ സ്‌തുതിക്കുകയും വാഴ്ത്തുകയും വന്ദിക്കുകയും ചെയ്യുന്നു.
പ:
സർവ്വശക്തനായ കർത്താവേ, ഈ ഗോതമ്പ് ഒരു കാലത്ത് ചിതറപ്പെട്ടിരുന്നു എങ്കിലും ഇപ്പോൾ ഒരപ്പമായിത്തീർന്നതുപോലെ നിൻ്റെ സഭയെ ഭൂമിയുടെ അറുതികളിൽനിന്ന് നിൻ്റെ രാജ്യത്തിൽ നീ കൂട്ടിച്ചേർക്കുമല്ലോ. ഞങ്ങളുടെ പിതാവേ, ഞങ്ങൾക്കുവേണ്ടി കാൽവറിയിൽ ചൊരിയപ്പെട്ട ക്രിസ്തുവിൻ്റെ വിലയേറിയ രക്തത്തിനായും നുറുക്കപ്പെട്ട അവൻ്റെ വിലയേറിയ ശരീരത്തിനായും നിനക്കു ഞങ്ങൾ സ്തോത്രം ചെയ്യുന്നു. അവയുടെ പ്രതിരൂപമായി ഇവയെ, അവൻ ഞങ്ങളോട് ആജ്ഞാപിച്ചപ്രകാരം അവൻെറ മരണത്തെ പ്രസ്താവിക്കുന്നതിനായി ഞങ്ങൾ ആചരിക്കുന്നു. അവൻ മുഖാന്തരം എന്നന്നേക്കും നിനക്ക് ഞങ്ങൾ മഹത്വം സമർപ്പിച്ചുകൊള്ളുന്നു.
ജ:
ആമേൻ.
പരിശുദ്ധാത്മാവിനുവേണ്ടിയുള്ള അപേക്ഷ
പ:
പിതാവായ ദൈവമേ, ഞങ്ങളോടു കരുണ ചെയ്യേണമേ. സിംഹാസന രാജ്യത്വത്തിലും നിത്യമായ തത്വത്തിലും നിനക്കും നിൻ്റെ പുത്രനും തുല്യനായിരിക്കുന്ന കർത്താവും, പഴയതും പുതിയതുമായ നിയമത്തിൽ സംസാരിച്ചവനും യോർദ്ദാൻ നദിയിൽ വച്ച് ഞങ്ങളുടെ കർത്താവായ യേശുമശിഹായുടെമേൽ പ്രാവുപോലെയും മാളികമുറിയിൽ വച്ച് അപ്പൊസ്തലന്മാരുടെമേൽ അഗ്നിനാവുപോലെയും ഇറങ്ങി വന്നവനുമായ നിൻ്റെ പരിശുദ്ധാത്മാവിനാൽ ഞങ്ങളെ നിറയ്ക്കേണമേ.
ജ:
ആമേൻ.
പ്രത്യേകമായ അപേക്ഷകൾ
പ:
ദൈവമായ കർത്താവേ, ഭൂലോകമെങ്ങുമുള്ള നിൻ്റെ വിശുദ്ധ സഭയ്ക്കുവേണ്ടിയും - വിശേഷാൽ അതിൻ്റെ ഒരു ഭാഗമായ - സെൻ്റ് തോമസ് ഇവാൻജലിക്കൽ ചർച്ച് ഓഫ് ഇൻഡ്യയ്ക്കുവേണ്ടിയും ഞങ്ങൾ പ്രാർത്ഥിക്കുന്നു.- നിൻ്റെ പരിശുദ്ധാത്മാവിൻ്റെ ദാനങ്ങൾ - അതിനു ധാരാളമായി നൽകേണമേ. - സത്യത്തിൻ്റെ വചനത്തെ - ശരിയായി വിഭാഗിച്ചുകൊടുക്കുന്ന നിൻ്റെ സകല മക്കളേയും,- ഞങ്ങളുടെ പ്രിസൈഡിംഗ് ബിഷപ്പിനെയും , ബിഷപ്പന്മാരെയും, പട്ടക്കാരെയും, ശെമ്മാശന്മാരേയും, സുവിശേഷകരെയും, സേവിനിമാരേയും, സഭാംഗങ്ങളായ സകല വിശ്വാസികളെയും ഓർത്തുകൊള്ളണമേ.
ജ:
ആമേൻ.
(മന:പ്രാർത്ഥനയ്ക്കുള്ള സമയം - സമയോചിതം പോലെ സഭയിലെ സ്ഥാപനങ്ങൾക്കും മറ്റും വേണ്ടി പ്രാർത്ഥനകൾ നടത്താം)
പ:
മഹാ ദൈവവും നമ്മുടെ രക്ഷിതാവുമായ യേശു മശിഹായുടെ അനുഗഹങ്ങൾ നാം എല്ലാവരോടും കൂടെ എന്നേക്കും ഉണ്ടായിരിക്കട്ടെ.
ജ:
കരുണയുള്ളവനേ, നിൻ്റെ വാതിലിൽ ഞങ്ങളുടെ അപേക്ഷകളുടെ ശബ്ദം മുട്ടുന്നു. നിന്നെ വന്ദിക്കുന്നവരിൽനിന്ന് അവരുടെ ആവശ്യങ്ങളുടെ യാചനയെ നീ മുടക്കരുതേ. ആമേൻ
(അല്ലെങ്കിൽ ഗീതം)
1. ആർദ്രമതേ, വാതിലിൽ മുട്ടുന്നു-ഹാലേലൂയ്യാ-ഉ-ഹാലേലൂയ്യാ
പ്രാർത്ഥനയിൽ നാദമെങ്ങളുടെ- കുറിയേലായിസ്സോൻ
2. നിന്നെ വിളിക്കുന്നു, നായകനേ-ഹാലേലൂയ്യാ-ഉ-ഹാലേലൂയ്യാ
നിൻ തുണയ്ക്കായ്, ബലഹീനർ- കുറിയേലായിസ്സോൻ
3. നല്ലവനേ, കേട്ട് യാചനങ്ങൾ-ഹാലേലൂയ്യാ-ഉ-ഹാലേലൂയ്യാ
നൽകണമേ നിൻ കാരുണ്യത്താൽ- കുറിയേലായിസ്സോൻ
പ:
പ്രാർത്ഥനകൾ കൈക്കൊള്ളുന്നവനും, യാചനകൾ നല്‌കുന്നവനുമായ ദൈവം തമ്പുരാനേ, ഞങ്ങൾ നിന്നോടു യാചിച്ച് പരിശുദ്ധനായ നിൻ്റെ ഏകപുത്രൻ ഞങ്ങളെ പഠിപ്പിച്ച കർത്തൃപ്രാർത്ഥന തകർന്ന ഹൃദയത്തേടെ തിരുമുമ്പാകെ ഞങ്ങൾ പ്രാർത്ഥിച്ചു ചൊല്ലുന്നു.
സ്വർഗ്ഗസ്ഥനായ ഞങ്ങളുടെ പിതാവേ,
ജ:
നിൻ്റെ നാമം വിശുദ്ധീകരിക്കപ്പെടേണമേ; നിൻ്റെ രാജ്യം വരേണമേ; നിൻ്റെ ഇഷ്ടം സ്വർഗ്ഗത്തിലെപ്പോലെ ഭൂമിയിലും ആകേണമേ; ഞങ്ങൾക്ക് ആവശ്യമുള്ള ആഹാരം ഇന്നു തരേണമേ; ഞങ്ങളുടെ കടക്കാരോട് ഞങ്ങൾ ക്ഷമിച്ചിരിക്കുന്നതുപോലെ - ഞങ്ങളുടെ കടങ്ങളെ ഞങ്ങളോടും ക്ഷമിക്കേണമേ; ഞങ്ങളെ പരീക്ഷയിൽ കടത്താതെ - ദുഷ്ടങ്കൽനിന്നു ഞങ്ങളെ വിടുവിക്കേണമേ; രാജ്യവും ശക്തിയും മഹത്വവും - എന്നേക്കും നിനക്കുള്ളതല്ലോ. ആമേൻ. (മത്താ. 6:9-13)
പ:
ദൈവമായ കർത്താവേ, സഹിക്കാവതല്ലാത്ത പരീക്ഷയിലേക്ക് ഞങ്ങളെ പ്രവേശിപ്പിക്കാതെ, പരീക്ഷയ്ക്കു നീക്കുപോക്കുണ്ടാക്കിക്കൊണ്ട്, ദുഷ്ടനിൽനിന്ന് ഞങ്ങളെ രക്ഷിച്ചുകൊള്ളേണമേ. നിനക്കും നിൻ്റെ ഏക പുത്രനും, പരിശുദ്ധാത്മാവിനും സ്തുതിയും സ്തോത്രവും ഞങ്ങൾ കരേററും.
ജ:
ആമേൻ.
പ:
നമുക്കെല്ലാവർക്കും സമാധാനമുണ്ടായിരിക്കട്ടേ.
ജ:
ആമേൻ.
പ:
വിശുദ്ധിയുള്ളതും മഹത്വമുള്ളതും സൃഷ്ടിയല്ലാത്തതും സ്വയം ഭൂവായതും, ആദ്യന്തമില്ലാത്തതും വന്ദ്യമായിരിക്കുന്നതും തത്വത്തിൽ ഏകമായിരിക്കുന്നതുമായ ത്രിത്വത്തിൻ്റെ കൃപയും അനുഗ്രഹങ്ങളും നാം എല്ലാവരോടും കൂടെ എന്നേക്കും ഉണ്ടായിരിക്കട്ടെ.
ജ:
ആമേൻ.
പ:
ഈ വിശുദ്ധ ദ്രവ്യങ്ങൾ വിശുദ്ധിയും വെടിപ്പും ഉള്ളവർക്കു നൽകപ്പെടുന്നു.
ജ:
ആമേൻ.
പ:
പിതാവിനും പുത്രനും പരിശുദ്ധാത്മാവിനും സ്തുതി.
ജ:
ആദിമുതൽ എന്നന്നേക്കും അവർ ഒന്നുതന്നെയാകുന്നു. ആമേൻ.
പ:
ഏകപിതാവു പരിശുദ്ധനാകുന്നു; ഏകപുത്രൻ പരിശുദ്ധനാകുന്നു; ഏകാത്മാവും പരിശുദ്ധനാകുന്നു,
ജ:
ആമേൻ.
പ:
തൻ്റെ കരുണയാൽ ലോകത്തെ നിർമ്മിച്ച പരിശുദ്ധനായ ഏകപിതാവു നമ്മോടുകൂടെ.
ജ:
ആമേൻ.
പ:
തൻ്റെ തിരുമേനിയുടെ വിലയേറിയ കഷ്‌ടാനുഭവങ്ങളാൽ ലോകത്തെ വീണ്ടെടുത്ത പരിശുദ്ധനായ ഏക പുത്രൻ നമ്മോടുകൂടെ
ജ:
ആമേൻ.
പ:
ഉണ്ടായതും ഉണ്ടാകുന്നതുമായ സകലത്തേയും നിവൃത്തിവരുത്തുന്ന ജീവനും വിശുദ്ധിയുമുള്ള ഏകാത്മാവും നമ്മോടുകൂടെ
ജ:
ആമേൻ.; കർത്താവിൻ്റെ തിരുനാമം എന്നന്നേക്കും വാഴ്ത്തപ്പെട്ടതായിരിക്കട്ടെ
(തിരുവത്താഴത്തിൽ സംബന്ധിപ്പാൻ മുട്ടുകുത്തേണ്ട സമയം)
പ:
ഞങ്ങളുടെ രക്ഷയ്ക്കായി വന്നവനും ഞങ്ങളുടെ ഉയിർത്തെഴുന്നേൽപ്പിനും, ഞങ്ങളുടെ വർഗ്ഗത്തിൻ്റെ എന്നന്നേക്കുമുള്ള പുതുക്കത്തിനുമായി വരുവാനിരിക്കുന്നവനുമായ ദൈവപുത്രാ! -പാപപരിഹാരം ചെയ്തിരിക്കുന്നതായ നിൻ്റെ ക്രൂശിലെ യാഗത്താൽ ഉണ്ടായിരിക്കുന്ന പാപമോചനത്തിനായി നിനക്കു ഞങ്ങൾ സ്തോത്രം ചെയ്യുന്നു.
ജ:
ആമേൻ.
പ:
കടങ്ങളുടെ പരിഹാരത്തിനും പാപങ്ങളുടെ മോചനത്തിനുമായി ഗോൽഗോഥായിൽ നമുക്കുവേണ്ടി തന്നത്താൻ യാഗമായി അർപ്പിച്ച നമ്മുടെ കർത്താവായ യേശു മശിഹായെ ഓർമ്മിക്കുന്നതിനായി ഇവ നിങ്ങൾക്ക് നൽകപ്പെടുന്നു.
ജ:
ആമേൻ.
(ഇവിടെ പട്ടക്കാരും ജനങ്ങളും തിരുവത്താഴം കൈക്കൊള്ളുന്നു.)
പ:
ഞങ്ങളുടെ കർത്താവും ഞങ്ങളുടെ ദൈവവുമേ, എന്നേക്കും നിനക്കു സ്തുതി, നിനക്കു സ്തുതി, നിനക്കു സ്തുതി. കർത്താവേ, ഈ വിശുദ്ധ കൂട്ടായ്മയിൽ പങ്കുകൊള്ളുന്നതിന് ഞങ്ങളെ യോഗ്യതയുള്ളവരാക്കിയ നിൻ്റെ കരുണയുടെ ബഹുത്വം നിമിത്തം നിനക്കു ഞങ്ങൾ സ്തോത്രം ചെയ്യുന്നു. ഇത് ഞങ്ങളുടെ ജീവിതത്തിൽ ഉണർച്ചയ്ക്കും ശക്തിക്കും പ്രയോജനപ്രദമാക്കി തീർക്കണമെന്ന് നിന്നോടു ഞങ്ങൾ അപേക്ഷിക്കുന്നു.
ജ:
ആമേൻ.
പ:
മനുഷ്യവർഗ്ഗത്തിൻ്റെ രക്ഷയ്ക്കായിട്ട് സ്വർഗ്ഗം ചായിച്ച് ഇറങ്ങിവന്ന വലിയവനും അത്ഭുതവാനുമായ ദൈവപുത്രാ! ഞങ്ങൾ നിന്നെയും നിൻ്റെ പിതാവായ ദൈവത്തേയും നിൻ്റെ പരിശുദ്ധാത്മാവിനേയും ഇടവിടാതെ സ്തുതിപ്പാൻ തക്കവണ്ണം ഞങ്ങളുടെ മേൽ അനുഗ്രഹം ചെരിയേണമേ.
ജ:
ആമേൻ.
ഗീതം
പ:
ഞങ്ങൾക്കുള്ള കർത്താവേ - ഞങ്ങളെയെല്ലാം വാഴ്ത്തണമേ
ഞങ്ങൾക്കുള്ള സൃഷ്ടാവേ - ഞങ്ങളെയെല്ലാം കാക്കണമേ
ജ:
സകലത്തിനും ഉടയവനാം - തുണയരുളീടും കർത്താവേ
രക്ഷയ്ക്കുള്ള വഴിയെ നീ - ഞങ്ങൾക്കെന്നും കാണിക്ക.
പ:
അലിവുനിറഞ്ഞ ബലവാനേ - അനുഗ്രഹമെങ്ങൾക്കേകണമേ
ജ:
നല്ല പ്രയോജനമുള്ളവരായ് - നടത്തീടണമെ അടിയാരെ .
പ:
കർത്താവേ കരുണാകരനേ - ഞങ്ങളിൽ നീ കൃപ ചെയ്യണമേ
ജ:
കുറവുവരാത്തൊരഭിവൃദ്ധി - ഞങ്ങൾക്കെപ്പൊഴുമേകണമേ.
പ:
സൗഖ്യസമാധാനാഹാരം - ഞങ്ങൾക്കരുളുക കർത്താവേ
ജ:
കാലോചിതമാം ഭാഗ്യത്താൽ - തുഷ്ടിവരുത്തണമെങ്ങൾക്ക്.
പ:
പ്രിയരെ, നമ്മുടെ കർത്താവിൻ്റെ ക്രൂശിലെ യാഗത്താൽ നാം പ്രാപിച്ചിരിക്കുന്ന വാഴ്‌വുകളോടും അനുഗ്രഹങ്ങളോടും കൂടെ വിശുദ്ധിയും മഹത്വവുമുള്ള മഹാ ദൈവത്തിൻ്റെ കൃപയ്ക്ക് നമ്മൾ അർഹരായിരിക്കുന്ന ഈ സമയത്ത് സമാധാനത്തോടെ പോകുവീൻ. ബലഹീന ദാസനായ എനിക്കും നിങ്ങളുടെ പ്രാർത്ഥനയാൽ കരുണയും സഹായവും ലഭിപ്പാൻ നിങ്ങൾ സന്തോഷപൂർവ്വം എനിക്കുവേണ്ടിയും പ്രാർത്ഥിപ്പിൻ.
ജ:
കർത്താവേ, തിരുസന്നിധിയിൽ ശുശ്രൂഷ ചെയ്ത നിൻ്റെ ദാസനെ അനുഗ്രഹിക്കേണമേ - ഞങ്ങളുടെ പ്രാർത്ഥനകളും അപേക്ഷകളും കൈക്കൊള്ളേണമേ; നിൻെറ വാഴ്‌വുകൾക്കും അനുഗ്രഹങ്ങൾക്കും ഞങ്ങളെ യോഗ്യരാക്കി സമാധാനത്തോടെ അയക്കേണമേ.
ഗീതം
സഭ:
1. അനുഗ്രഹത്തോടെ ഇപ്പോൾ - അയക്ക അടിയാരെ യഹോവായേ!
മനസലിവുയടയ മഹോന്നത പരനേ വന്ദനം നിനക്കാമേൻ.
2. തിരുക്കരുണാസനത്തിൽ - നിന്നു കൃപയടിയാരുടെമേൽ
വരണം എല്ലായ്‌പ്പോഴും ഇരിക്കണം രാപ്പകൽ വന്ദനം നിനക്കാമേൻ.
3. തിരുസമാധാനവാക്യം അടിയാർ സ്ഥിരപ്പെടാൻ അരുൾക ഇപ്പോൾ
അരുമ നിൻ വേദത്തെ അരുളിയ പരനെ ഹല്ലേലുയ്യാ! ആമേൻ.
തിരുവത്താഴ സമയം ഉപയോഗിക്കാവുന്ന ഗീതങ്ങൾ
1. സ്നേഹ വിരുന്നനുഭവിപ്പാൻ
പല്ലവി
സ്നേഹ വിരുന്നനുഭവിപ്പാൻ
സ്നേഹ ദൈവമക്കളെല്ലാവരും കൂടുവിൻ
ജയം ജയം നമുക്ക്
അനുപല്ലവി
പക തിങ്ങി ലോക മക്കൾ
പല കുലം ജാതികളായ് - പിരിഞ്ഞു നാൾക്കുനാൾ
പരനോടെതിർക്കുന്നു
(സ്നേഹ...)
നമുക്കൊരു പിതാവു തന്നെ
നമുക്കേവർക്കും ജീവൻ അരുളീടുന്നതും
ദൈവാത്മാവു തന്നെ
നമുക്കേക രക്ഷകനാം
നമുക്കേവർക്കും കൂടെയിരിപ്പതിന്നിനി
സ്വർഗ്ഗം ഒന്നുതന്നെ
(സ്നേഹ...)
നമുക്കേക ഭോജനമേ
നമുക്കേവർക്കും നിഴൽ വെളിച്ചത്തുണതും
യേശു നായകനേ
വഴിവാതിൽ സ്നാനമൊന്നേ
ക്രിസ്തു വിധി ചൊല്ലുന്നേരം നമുക്കെല്ലാവർക്കും
വലത്തുഭാഗമൊന്നേ
(സ്നേഹ...)
സ്നേഹക്കുറി തൊട്ടീടണം നാം
നിയമം ഇതേശുവിൽ ജനങ്ങൾക്കേവർക്കും
നിയമിച്ചേശുപരൻ
പക പേയുടെ കുറിയാം
പരനേറെ സങ്കടം കോപവും വരും
പിണങ്ങും ലോകരോടെ
(സ്നേഹ...)
ക്രിസ്തൻ തിരുചിന്ത ധരിപ്പിൻ
കുരിശെടുത്തു താഴ്മയോടവൻ പിൻ ചെല്ലുവിൻ
തിരുകൃപ ലഭിപ്പാൻ
ഏക മനസ്സോടെ ജപിപ്പിൻ
അവസാനത്തോളം നിലനിന്നീടുവിൻ
വരും ഭാഗ്യം നമുക്കേ
(സ്നേഹ...)
2. വാഴ്ത്തീടുന്നു വാഴ്ത്തീടുന്നു
1. വാഴ്ത്തീടുന്നു വാഴ്ത്തീടുന്നു വാഴ്ത്തീടുന്നു ഞാൻ എൻ
രക്ഷകനെ നന്ദിയോടെ വാഴ്ത്തീടുന്നു ഞാൻ
2. മാട്ടിൻ തൊഴുത്തിൽ പിറന്ന മാന്യസുതനേ
ഹീനവേഷമെടുത്ത നിന്നെ വാഴ്ത്തീടുന്നു ഞാൻ
3. പാതകർക്കായ് നീതി വഴി-ഓതിത്തന്നോനെ
പാരിടത്തിൽ നിന്നെയോർത്തു വാഴ്ത്തീടുന്നു ഞാൻ
4. കുരിശെടുത്തു മലമുകളിൽ നടന്നുപോയോനെ-തൃ-
പ്പാദം രണ്ടും ചുംബിച്ചിപ്പോൾ വാഴ്ത്തീടുന്നു ഞാൻ
5. കുരിശിലേറി മരിച്ചുയർത്തു സ്വർഗ്ഗേപോയോനേ
നിത്യം ജീവിക്കുന്നവനേ വാഴ്ത്തീടുന്നു ഞാൻ
3. മനസ്സോടെ ശാപ-മരത്തിൽ തൂങ്ങിയ
1. മനസ്സോടെ ശാപ-മരത്തിൽ തൂങ്ങിയ
മനുവേലാ ദൈവജാതാ
നിനക്കീ വേദന-വരുത്തിവെച്ചതീ
നീചൻ ഞാൻ-യ്യോ
2. പരമനീതിയെൻ ദുരിത്താലെന്നെ
അരിവാൻ നിന്നൊരു നേരം
പരമൻ നീ അതാൽ അറിയപ്പെടീടാൻ
ഇറങ്ങിവന്ന-ല്ലോ
3. മലപോലെ ശാപം-ജ്വലിച്ചിറങ്ങിയ
നിലത്തിൻ പാതകം-മൂലം
അലിഞ്ഞു നീ ശാപം-തലയിൽ കൊണ്ടിടാൻ
വലിമവിട്ട-ല്ലോ
4. നന്ദികെട്ട ഈ നരരെ നരക
അഗ്നിയിൽ നിന്നു നേടാൻ
മന്നവാ! തിരു പൊൻ കുരുതി നീ
ചിന്തി നിന്ന-ല്ലോ?
5. ദൈവകോപത്തിൻ-ദർശനം വിട്ടു
പാപി ഞാൻ ഒളി-ച്ചീടാൻ
സർവ്വലോകത്തിൻ-നായകാ നിൻ
വി-ലാവും വി-ണ്ടല്ലോ
6. മരിച്ചവർക്ക-മൃതായ് നിൻ ദേഹത്തെ
നുറുക്കിയോ ജീവനാഥാ!
മുറിഞ്ഞുടഞ്ഞ നിൻ-തിരുമെയ്യിൽ രക്തം
ചൊരിഞ്ഞല്ലോ പാരിൽ
7. അരിഷ്ട പാപി നിൻ തിരുപുണ്യങ്ങളിൽ
ശരണം വെച്ചുവ-ന്നയ്യോ!
തിരുപ്രതിമയാ -അടിയാനെകൃപ
നിറഞ്ഞ കർത്താ-വേ
4. പാപത്തിൻ മാ വിഷത്തെയൊഴിപ്പാൻ
1. പാപത്തിൻ മാ വിഷത്തെയൊഴിപ്പാൻ
സാത്താൻ തന്നുടെ ബലമഴിപ്പാൻ
രക്ഷകൻ ഇക്ഷിതിയിൽ വന്നാൻ - യേശുവിനു മഹത്വം!
യേശുവിനു മഹത്വം! മഹത്വം യേശുവിനു മഹത്വം
കുരിശിലവൻ മരിച്ചെൻപേർക്കായ്‌ - യേശുവിനു മഹത്വം
2. ആശയറ്റെൻ സ്ഥിതി താനറിഞ്ഞു
ഈശ കോപാഗ്നിയിൽ വീണെരിഞ്ഞു
വിശുദ്ധ നിണം വിയർപ്പായ്‌ ചൊരിഞ്ഞു - യേശുവിനു മഹത്വം!
3. തൻ മുഖപങ്കജമതിലടിച്ചു
തലയിൽ മുൾമുടി വെച്ചാഞ്ഞടിച്ചു
മുതുകിനെ ഉഴുതതുപോൽ തകർത്തു - യേശുവിനു മഹത്വം!
4. ക്രൂശിൽ കൈകാൽകളെ താൻ വിരിച്ചു
ക്രൂരന്മാർ ആണികൊണ്ടതിൽ തറച്ചു
കൊടിയ വേദനയെനിക്കായ്‌ സഹിച്ചു - യേശുവിനു മഹത്വം!
5. ചൊരിഞ്ഞു തൻ തിരുനിണം എൻ ബലിയായ്
നുറുങ്ങിയെൻ പാപത്താലേശുവിൻ മെയ്‌
തകർന്നു തൻഹൃദയം എൻപേർക്കായ് - യേശുവിനു മഹത്വം!
6. യേശുവിൻ സ്നേഹവിശേഷമതിൻ
ആശയം ഹരിച്ചാൽ എനിക്കതു തേൻ
ശാശ്വത ഭാഗ്യമെനിക്കതിനാൽ - യേശുവിനു മഹത്വം!
7. ജീവനെ യേശുവിനർപ്പിച്ചെൻ
സർവ്വവുമവനായേൽപിച്ചേൻ
പാവനജീവിതമാകണമെൻ - യേശുവിനു മഹത്വം!
5. കുഞ്ഞാട്ടിൻ തിരു രക്തത്താൽ
1. കുഞ്ഞാട്ടിൻ തിരു രക്തത്താൽ ഞാൻ ശുദ്ധനായ് തീർന്നു
തൻ ചങ്കിലെ ശുദ്ധരക്തത്താൽ ഞാൻ ജയം പാടിടും
മഹത്വം രക്ഷകാ സ്തുതി നിനക്കെന്നും
ചേറ്റിൽ നിന്നെന്നെ നീ വീണ്ടെടുത്തതിനാൽ
സ്തുതിക്കും നിന്നെ ഞാൻ ആയുസ്സിൻ നാളെല്ലാം
നന്ദിയോടടി വണങ്ങും
2. ആർപ്പോടു നിന്നെ ഘോഷിക്കും ഈ സീയോൻ യാത്രയിൽ
മുമ്പോട്ടു തന്നെ ഓടുന്നു എൻ വിരുതിനായി
ലഭിക്കും നിശ്ചയം എൻ വിരുതെനിക്ക്
ശത്രുക്കളാരുമേ കൊണ്ടുപോകയില്ല
പ്രാപിക്കും അന്നു ഞാൻ രാജൻ കയ്യിൽനിന്ന്
ദൂതന്മാരുടെ മദ്ധ്യത്തിൽ
3. എൻ ഭാഗ്യകാലം ഓർക്കുമ്പോളെന്നുള്ളം തുള്ളുന്നു
ഈ ലോകസുഖം തള്ളി ഞാനാഭാഗ്യം കണ്ടപ്പോൾ
നിത്യമാം രാജ്യത്തിലന്നു ഞാൻ പാടിടും
രാജൻമുഖം കണ്ടു എന്നും ഞാൻ ഘോഷിക്കും
രക്തത്തിൻ ഫലമായ് വാഴുമെ സ്വർഗ്ഗത്തിൽ
കോടികോടി യുഗങ്ങളായി
4. മനോഹരമാം സീയോനിൽ ഞാൻ വേഗം ചേർന്നീടും
എൻ ക്ലേശമാകെ നീങ്ങിപ്പോം അവിടെയെത്തുമ്പോൾ
നിത്യമാം സന്തോഷം പ്രാപിക്കും അന്നു ഞാൻ
എൻ ശത്രുവിന്നതു എടുപ്പാൻ പാടില്ല
ആനന്ദം കൂടീടും സാനന്ദം പാടിടും
ശ്രീയേശു രാജൻ മുമ്പാകെ
6. ക്രിസ്തുവിൻ്റെ ദാനം എത്ര മധുരം
1. ക്രിസ്തുവിൻ്റെ ദാനം എത്ര മധുരം
പൂർണ്ണസമാധാനം പൂർണ്ണ ആനന്ദം
എത്രയോ വിസ്താരം ഉള്ളോർ നദിപോൽ
അളക്കാമോ ആഴം ഇല്ലൊരളവ്
എൻ്റെ അടിസ്ഥാനം — ക്രിസ്തുയേശുവിൽ
പൂർണ്ണസമാധാനം — ഉണ്ട് പാറയിൽ
2. പണ്ടേ എൻ്റെ പാപം മന:സാക്ഷിയെ
കുത്തി ഈ വിലാപം തീർന്നതെങ്ങിനെ
എൻ വിശ്വാസ കൺകൾ നോക്കി ക്രൂശിന്മേൽ -
എല്ലാം തീർത്തുതന്നു എൻ ഇമ്മാനുവേൽ
(എൻ്റെ....)
3. കർത്തൻ ഉള്ളം കൈയിൽ മറഞ്ഞിരിക്കെ
പേയിൻ സൂത്രം എന്നിൽ മറ്റും വെറുതെ
തീർത്ത ആയുധങ്ങൾ എല്ലാം തകരും-
ഇല്ല ചഞ്ചലങ്ങൾ ധൈര്യമോ പാരം-
(എൻ്റെ....)
4. ഭയം സംശയങ്ങൾ തീരെ നീങ്ങുവാൻ
എത്ര വാഗ്ദത്തങ്ങൾ തന്നിട്ടുണ്ടു താൻ
അതിലൊരു വള്ളിയില്ലാതാകുമോ?
പോകയില്ലോർ പുള്ളി സാത്താനേ നീ പോ-
(എൻ്റെ....)
5. ബുദ്ധിമുട്ടു കഷ്ടം പെരുകി വന്നാൽ
എനിക്കെന്തു നഷ്ടം ഞാൻ കർത്താവിൻ ആൾ
അവൻ എൻ്റെ സ്വന്തം തൻ്റെ രാജ്യവും
എനിക്കുള്ള അംശം അതാരെടുക്കും
(എൻ്റെ....)
7. ആശിഷമാരിയുണ്ടാകും
1. ആശിഷമാരിയുണ്ടാകും - ആനന്ദവാഗ്ദത്തമേ
മേൽ നിന്നു രക്ഷകൻ നൽകും- ആശ്വാസകാലങ്ങളെ
ആശിഷമാരി-ആശിഷം പെയ്യേണമേ
കൃപകൾ വീഴുന്നു ചാറി - വൻമഴ താ ദൈവമേ!
2. ആശിഷമാരിയുണ്ടാകും വീണ്ടും നൽ ഉണർവ്വുണ്ടാം
കുന്നുപള്ളങ്ങളിന്മേലും കേൾ വൻമഴയിൻ സ്വരം
(ആശി....)
3. ആശിഷമാരിയുണ്ടാകും കർത്താ തരിക ഞങ്ങൾക്കും
ഇപ്പോൾ നിൻ വാഗ്ദത്തം ഓർത്തു-നൽവരം തന്നിടുക
(ആശി....)
4. ആശിഷമാരിയുണ്ടാകും എത്ര നന്നിനു പെയ്കിൽ
പുത്രൻ്റെ പേരിൽ തന്നാലും ദൈവമേ ഇന്നേരത്തിൽ
(ആശി....)
